Домой В регионе У бабруйскім касцёле зачыталі зварот Тадэвуша Кандрусевіча з нагоды выбараў

У бабруйскім касцёле зачыталі зварот Тадэвуша Кандрусевіча з нагоды выбараў

Фото с сайта: https://catholic.by

Каталіцкі Касцёл Беларусі не застаўся ў баку ад сацыяльна-палітычнай сітуацыі ў краіне. Мітрапаліт Мінска-Магілёўскі, арцыбіскуп Тадэвуш Кандрусевіч падрыхтаваў адмысловы зварот да вернікаў, у якім тлумачыць, як Касцёл глядзіць на выбары і ўдзел у іх. У нядзелю 2 жніўня пасланне зачыталі парафіянам святары бабруйскага касцёла.

Прыводзім вытрымкі са звароту.

«З кожным днём мы набліжаемся да выбараў прэзідэнта нашай дзяржавы. Сёлетняя выбарчая кампанія праходзіць у складанай сацыяльна-палітычнай сітуацыі.

Натуральна, што перад выбарамі паўстае пытанне: за каго галасаваць?

Паводле прынцыпаў сацыяльнага вучэння, Касцёл не атаясамліваецца ні з якой палітычнай сілай і, у адпаведнасці з беларускім заканадаўствам, не выконвае палітычных функцый, а служыць усім людзям і таму не можа выказвацца за таго ці іншага кандыдата.

Аднак разам з тым Касцёл нагадвае, што ўдзел у выбарах з’яўляецца праяўленнем адказнасці і сталасці ў будаванні будучыні нашай краіны.

Яна залежыць ад нас, і сёння мы яе выбіраем. Пры гэтым выбар павінен здзяйсняцца не пад уплывам эмоцый, але быць плёнам сталага роздуму, згоднага з сумленнем і адпаведным распазнаннем, як кажа Папа Францішак.

Дзеля гэтага неабходна не толькі ўважліва вывучыць праграмы кандыдатаў з палітычнага, эканамічнага і сацыяльнага пунктаў гледжання, але і ўзяць пад увагу іх адносіны да сацыяльнага вучэння Касцёла і агульначалавечых каштоўнасцяў, а таксама маральных прынцыпаў, якія нязменныя і таму не падлягаюць абмеркаванню і змяненню.

Перадусім варта звярнуць увагу на:

  • падтрымку інстытуту сям’і і пашану да яе як адзінага і неразрыўнага саюзу мужчыны і жанчыны з мэтай сумеснага жыцця, нараджэння і выхавання патомства;
  • абарону Божага дару жыцця ад зачацця да натуральнай смерці;
  • свабоду веравызнання;
  • клопат пра сацыяльную справядлівасць;
  • недапушчальнасць амаральнай дзейнасці і да т.п.

Пандэмія каранавірусу, якая абрынулася на нас, нібы гром з яснага неба, стала імпульсам да лепшага асэнсавання таксама іншых «эпідэмій», якіх нямала ў нашым грамадстве. Сёння з эпідэміямі можна параўнаць эканамічны крызіс, сацыяльную і палітычную нестабільнасць, грахоўнае жыццё і іншыя нездаровыя праявы. Усе яны ўзаемазвязаныя, уплываюць адна на адну і, у выніку, адбіваюцца на ўсім грамадстве, што вядзе да напружанасці ў ім.

Ці можа наша сінявокая Беларусь быць адзінай сям’ёй, у якой усе любяць і паважаюць адзін аднаго? Ці мы, сыны і дочкі адной Маці-Радзімы, можам бачыць адно ў адным сваіх братоў і сясцёр? Ці здольныя мы дасягнуць такіх жаданых адзінства і згоды ў нашым грамадстве?

Рэцэпт гэтага знаходзіцца ў залатым этычным правіле рэлігійных і філасофскіх вучэнняў Захаду і Усходу, якое ляжыць у аснове ўсіх сусветных рэлігій: «Не рабі іншым таго, чаго не жадаеш сабе, і паступай з іншымі так, як хацеў бы, каб паступалі з табой». Гэта відавочны духоўны стандарт і спосаб узаемадзеяння для мірнага суіснавання розных меркаванняў.

У лёсавызначальны час нашай гісторыі і ў імя шчаслівай і мірнай будучыні Беларусі перадвыбарчая кампанія і самі выбары павінны адбывацца ў духу ўзаемапавагі да апанентаў са свабодным волевыяўленнем народа для агульнага дабра нашага грамадства».

 

У ліпені за сумленныя выбары вырашылі пазмагацца і звычайныя вернікі-каталікі, якія абвесцілі кампанію «Католік не фальсіфікуе» https://vk.com/club196903012. Мэта ініцыятывы – заклік да сябраў выбаркамаў ня ўдзельнічаць у фальсіфікацыях падчас галасавання і падліку галасоў.

«Заахвочваем каталікоў, якія ўваходзяць у склады выбарчых камісій, выконваць заканадаўства Беларусі і прадухіляць любыя парушэнні. Нагадваем, што фальсіфікацыя выбараў – гэта цяжкі грэх, з якога трэба спавядацца», – звяртаюцца стваральнікі кампаніі да беларусаў.

 

Марына Міхневіч