Домой Главные новости Крымінальную справу супраць бабруйчаніна нечакана спынілі. Але вяртацца ў Беларусь ён асцерагаецца

Крымінальную справу супраць бабруйчаніна нечакана спынілі. Але вяртацца ў Беларусь ён асцерагаецца

крымінальную
Уладзімір Лазараў, фота: facebook.com

Актывіст з Бабруйска Уладзімір Лазараў з’ехаў з Беларусі, каб не трапіць за краты, — на яго завялі крымінальную справу за пагрозу прымянення гвалту да супрацоўніка міліцыі (артыкул 364). Днямі стала вядома: справу спынілі.

Мужчына распавядае, як усё закруцілася. 22 чэрвеня ў Бабруйску судзілі затрыманых апазіцыянераў. Падтрымаць іх у суд прыйшла кампанія прыяцеляў. У аднаго з хлопцаў перад пачаткам пасяджэння завязалася спрэчка з міліцыянтам. Уладзімір, кажа, што стаяў побач.

Пра працяг гэтай гісторыі стала вядома ўвосень. У лістападзе на таго хлопца і Уладзіміра завялі крымінальную справу: на першага — за пагрозу дзецям міліцыянта, на другога — за апублічванне яго адрасу жыхарства.

«Я яго наогул не называў, бо не ведаў тады. Яны проста не ведалі, што мне прыляпіць. Я ў таго міліцыянта як бяльмо на воку, нашым напружаным адносінам ужо 10 год», — тлумачыць мужчына.

Уладзіміра выклікалі на допыты, праводзілі вочныя стаўкі з міліцыянтам. Урэшце мужчына вырашыў з’ехаць з Беларусі і ў студзені перабраўся ва Украіну. Другі фігурант той справы раней перабраўся ў Польшчу.

Днямі Уладзіміру прыйшоў ліст ад магілёўскай пракуратуры — крымінальны пераслед спынены праз адсутнасць складу злачынства. Паведамленне ў паштовай скрыні знайшлі сябры.

«Тэлефанаваў таму хлопцу ў Польшчу — яму такая папера не прыходзіла. Але я не гару жаданнем вяртацца. Думаю, проста хочуць мяне выманіць», — кажа актывіст.

У сацсетках ён змяшчае рэзкія допісы і мяркуе, што калі вернецца, гэта можа стаць падставай для новай справы.

 

nn.by
Фота на галоўнай старонцы: facebook.com