Домой В стране Ці верыце вы, што ўлада ў краіне не будзе перадавацца ў спадчыну?

Ці верыце вы, што ўлада ў краіне не будзе перадавацца ў спадчыну?

Не так даўно кіраўнік дзяржавы падчас візіту ў Венесуэлу сказаў літаральна наступнае: «Тое, што ў Венесуэле мой сын Мікалай, сведчыць: ёсць каму пераняць эстафету гадоў праз 2025». Цяпер ён сцвярджае, што не гатовы перадаваць «экстафету» ніводнаму са сваіх трох сыноў. Дык якому Лукашэнку верыць? На гэтую тэму разважаюць эксперты «Тут і цяпер».

АФІЦЫЙНА

Ніякай перадачы ўлады ў спадчыну ў Беларусі быць не можа, заявіў Аляксандр Лукашэнка, выступаючы на ўрачыстым сходзе, прысвечаным Дню Незалежнасці Рэспублікі Беларусь.

«Я ўсё больш са здзіўленнем чытаю і чую пра тое, што вось тут Лукашэнка гэта назаўжды, гэта навечна, сказаў ён. У які раз кажу, не апраўдваючыся перад вамі Мае дзеці прэзідэнцтва наеліся пры сваім бацьку. Ніякай перадачы па спадчыне ўлады быць не можа».

Андрэй Ягораў, палітолаг:
«Беларусы дастаткова рацыянальныя, каб разумець, што нясе дыктатура»

Як пакавае досвед дыктатураў на тэрыторыі Еўропы, яны ніколі не перадаваліся ў спадчыну ў сучасным свеце. Усе дыктатуры існавалі да таго часу, пакуль жыў сам дыктатар. Таму ў Беларусі, як у еўрапейскай краіне, гэта малаверагодна. Ну але ж гэты чалавек можа розныя рэчы разглядаць, нават самыя неверагодныя. Мне здаецца, мы не дажывем да таго часу, калі гэтая магчымасць стане не гіпатэтычнай, а рэальнай. Мне б хацелася верыць, што, усё ж такі, з гэтай праблемай беларусы справяцца значна раней, чым прыйдзецца абіраць паміж працягам спадчыннай дыктатуры і пераходам да нейкага іншага ладу жыцця ў краіне. Беларусы дастаткова рацыянальныя і разумныя, каб разумець, што зараз дыктатура гэта асноўная прычына, якая тармозіць і развіццё краіны, і іх уласны лёс, і перашкаджае нармальнай будучыні іх дзяцей. Таму мы павінны вырашыць гэтую праблему на працягу жыцця хаця б майго пакалення.

Валянціна Сядых, юрыстка:
«Спадчынная ўлада найбольш верагодны сцэнар»

Дзе мы такое можам бачыць? У Паўночнай Карэі, у Сірыі і ў Азербайджане. Але ва ўсіх трох пералічаных краінах такое магчыма таму, што сапраўдная ўлада ёсць у нейкага пануючага клана, у якім трэба падтрымліваць раўнавагу. Вось няма Кім Чен Іра. І што? Цяпер будзе які-небудзь Хунь Юнь Сунь? Дык ён жа ўсіх перастраляе. І каб была раўнавага, ставіцца сынок. Гэта, вядома, вядзе да дэградацыі, як самой сістэмы, так і ўсёй краіны. Але сістэма ратуе перш найперш сябе, а не краіну. У Беларусі існуе ўлада, якая заточанае на тое, каб захаваць кіруючую кліку. У нас ужо ўсё ў парадку з дэградацыяй. Грамадзянскай супольнасці няма. Найбольш актыўныя звальваюць з краіны.

Здарыўся такі казус, што наша «афрыка» апынулася ў Еўропе. Ну і што? Геаграфія нас ні ад чаго не бароніць і не надае нам ніякіх стандартаў. Але ў такіх сістэмах часам спрацоўвае іншае. Калі ў кліцы захоўваецца раўнавага гэта добра. А калі яна губляецца, то гэта канчаецца пераваротам. Прычым выхадцам з той самай клікі. Такі сцэнар найбольш верагодны.

Аляксандр Старыкевіч, журналіст:
«Такі сцэнар не для дадзенага часу і не для дадзенага месца»

Я не веру ў магчымасць перадачы ўлады па спадчыне. Можна шукаць тлумачэнні, але вера не заўсёды грунтуецца на нейкіх абектыўных чынніках. Я ўсё ж такі думаю, што пры ўсіх заганах нашага грамадства, яно не да такой ступені безнадзейнае, каб тут ужо пачала існаваць спадчынная манархія. Пытанне нават не ў тым, што гэта выкліча нейкае надзвычайнае абурэнне ў краіне, і грамадзяне, як адзін, выйдуць на вуліцы і гучна скажуць: «НЕ!», «Досыць!», «Хопіць!» і гэтак далей. Але я думаю, што такі сцэнар перадачы ўлады не для дадзенага часу і не для дадзенага месца.

Юры Хашчавацкі, рэжысёр:
«Як гайка на пупе гэтага рэжыму»

Я веру, што будзе такая спроба. Я нават перакананы ў гэтым. Але пры гэтым ўпэўнены яшчэ і ў тым, што нічога з гэтага не атрымаецца. Таму, што Аляксандр Рыгоравіч, як у тым анекдоце, гайка на пупе ў гэтага рэжыму. Гайку адкруціш і ўсё адваліцца. Ніхто іншы так не здолее трымаць у страху абсалютна ўсіх. Абавязкова знойдуцца людзі, якія пачнуць адзін з адным змагацца. Прычым, да самазнішчэння. А ні ў каго з іх не існуе ніякай магчымасці ўтрымацца ля этай улады. Таму, што, акрамя ўсяго іншага, Лукашэнка давёў краіну да таго, што ў такім выглядзе яна ўжо трымацца не можа. І патрэбныя будуць іншыя людзі і іншая канцэпцыя. Пакуль усё трымаецца на страху перад Лукашэнкам. Але, як толькі яго не стане, усё пачне развальвацца.

Апытанне праводзіў Зміцер ЗЯЗЮЛЯ